اليك بعض النصائح الهامة التي تساعدك عند شراء سيارة جديدة:
اولا من الخارج
اولا من الخارج
حاول يكون وقت الإستلام بالنهار وخاصةّ والشمس طالعة أوي يعني من وقت الظهر للعصر عشان أي حاجة في الصاج او الدهان تشوفها كويس من حيث إذا كان فيها أي خبطة أو خدوش أو مرشوشة أو فيه فروق لون ولو الإستيكر الأبيض ده موجود شيله عشان لو فيه حاجة مستخبية كدة ولا كدة لأن أحياناّ كتير بيبقي تحت اللزق ده فروق لون وكمان ماتنساش تبص تحت العربيه اذا فيه اى لحامات او صدا او حاجه مسيله او بتنقط و اتاكد من تقفيل و فروقات الابواب و الشنطه و الكبوت مع جسم العربيه و تلاحظ من بعيد افقية وقفة العربيه و كمان تتاكد ان الكاوتش بشوكه
ثانيا من الداخل
راجع الأبواب كلها باب باب وشوف تقفيل الفيبر يعني متقفل مش مكسور ولا مشروخ و لا حتة مفكوكة والإزاز سليم بيطلع وبينزل بدون مشاكل ولا بتسمع صوت تزييق وجرب زراير الزجاج شغالة كويس بدون ما تعلق طالع نازل أكتر من مرة ورا بعض والمقابض برة وجوة تمام والسنترلوك شغال تكه واحده يفتح باب السواق تكه كمان يفتح باقى الابواب والجوان اللي حوالين القايم والباب تمام مش مقطوع ولا فيه أي مشاكل.
أقعد على الكراسى و جرب يطلع لقدام وورا والضهر بيرجع لورا وقدام والفرش والكراسي تمام مفيهومش أي قطع وتشوف الكنبة سليمة مش ملخلخة ولا فيها أي قطع وتجرب طى ظهر الكنبه اللى ورا طبعا
راجع موكيت أرضية العربية شوفه كله ميكونش فيه أي قطع وسليم من أول الطابلوه لحد الكنبة ومتقفل تمام التمام وفرش السقف متقفل ومفيهوش أي قطع وتشوف أحزمة الأمان كلها لما تشدها بترجع تاني و لا بتعلق والمكان اللي بيدخل فيه الحزام سليم ولا بيعلق لما تيجي تفتح الحزام وتشوف لمبة بيان فتح الابواب و الحزام فى التابلوه إذا كانت شغالة ولا لأ
نيجي بقي للطابلوه نفتح الأنوار كلها ونشوفها شغالة ولا لأ اللي هي عند العداد واللي تحت الزراير والفوانيس ورا وقدام والعالي والواطي والإشارات ورا وقدام واشارات المرايات
واللمبة بتاعت المارشدير بتنور ولا لأ وطبعا عندنا واحده بس يمين والفوجات امامى وورا واحده شمال ولمبة الصالون شغالة ولا لأ وبتشتغل مع الابواب و لا لأ ولمبة الهاند وجرب المساحات قدام و ورا و الرشاشات كمان وبعدين تجرب التكييف علي الدرجات المختلفة وتشوف الهوايات كلها شغالة ولا لأ والراديو تجرب كل زرايره وفتحاته والسماعات اللى قدام لان مفيش ورا والصوت وتجرب مكان الفلاشه وتشوف الراديو والإريال ميكونش مكسور ومحطوط منظر والصوت تمام وشوف الولاعة شغالة ولا لأ والطفاية موجودة ولا لأ اللى هى على شكل كبايه وتشوف الشماسات والمرايات بتفتح وتقفل بدون مشاكل وتراجع ظبطها بالكهرباء طبعا
الشنطة تشوفها بتتفح وبتتقفل تمام ولا فيه مشاكل والشداد شغال ولا لأ وتبص في الشنطة وتشيل الفرش اللي موجود وتبص مفيش صدأ والإستبن موجود والكوريك والعتله والرف اللي بيتحط عليه السماعات سليم ولا مكسور
الحوض بتاع الموتور بقي "الكابوت" تفتحه من جوة وتشوف بيفتح عادي و لا لأ وبيتقفل كويس و لا فيه مشكلة وتبص علي الحوض وإن ميكونش فيه صدأ تدور العربية و تتأكد ان صوته ناعم و الا لا وكل حاجة تبص عليها ومفيش أي حاجة مفكوكة وكله سليم وتراجع علي السوائل كلها زي زيت الموتور تكشف عليه وزيت الفرامل ومية المساحات والردياتير
ثالثا الحاجات اللى بتاخدها مع العربيه
1.كتالوج العربية
2.دفتر الصيانة والضمان مع صيانة 1000 وتتاكد ان مكتوب ضمان 5 سنين او 100000 كم
3.المفاتيح المفروض مفتاحين واحد بريموت السنتر والتانى عادى
4.الولاعة وطفاية السجاير.
الإستبن والكوريك وعصايته و مفتاح العجل مقاس
 |
| نصائح استلام سيارة جديدة |
ليست هناك تعليقات:
إرسال تعليق